Thomas og Evald - gode som GULL !!

Gfil er veldig stolte av våre Em deltakarar

I desse dagar går EM U23 av stabelen i polske Bydgoszcz.  Både i går og i dag har det vore flotte idrettsopplevingar for alle som har interesse for friidrett. Thomas kvalifiserte seg til finalen i går med fantastiske 68.34m, ny krinsrekord og personleg rekord i viktigaste konkurransen så langt i karrieren. I dag gjentok han det same i første kast i finalen med heile 68.28m. Hans to lengste kast i karrieren i det viktigaste stevnet . Berre å ta av seg hatten når ein greier å vere best når det gjeld. Han har no delteke i sitt tredje internasjonale meisterskap i ein alder av 20 år. Første var i U20 EM i Eskilstuna i 2015, andre var i VM U20 i Polen i 2016. Begge desse meisterskapa i diskos. Sesongen 2017 gjekk han for fullt inn for slegge med stor hell. 10 konkurransar sidan i fjor haust har han kasta over EM kravet på 63.50 med seniorslegga. Så toppa han det foreløpig i går med 68.34m og i dag i finalen med 68.28m. Det heldt til ein fantastisk 10 plass. Vi gratulerer så mykje !

Evald kvalifiserte seg til EM med ein kjempekonkurranse i Halle i Tyskland tidlegare i vår. Der persa han til 64.92m. Gjennom vinteren har han forbetra seg med over 3 meter frå sesongen 2016. Det var ein utruleg glad utøvar som kom heim frå Tyskland og hadde greidd kravet til sitt første internasjonale meisterskap. Han har til liks med Thomas lagt ned eit stort stykke arbeid for å greie desse prestasjonane. Vi kan vel godt seie at dei har fått betalt for det dei har lagt i potten. Tre konkurransar har Evald hatt over EM kravet på 63.50m. No hadde Evald ein vanskeleg konkurranse under kvaliken i EM torsdag formiddag. Buret bles ned og konkurransen vart avbroten. Han fekk ikkje vist seg fram slik han hadde sett føre seg, men ingen sure miner. Det er berre å komme seg vidare. Mange konkurranser gjenstår utover ettersommaren.

Mange harde økter i vektrommet på Rygg og like mange våte og sure kastøkter på Loggane har vore gjennomført. Likeeins sprintøkter ute heile vinteren i billysa frå ivrige trenarar. Loggane med skjul for veir og vind, varme i ringen og flomlys gjere det muleg å oppnå toppresultat. Vektrommet på Rygg med skikkeleg utstyr og alltid tilgjengeleg er heilt avgjerande for å få framgang. Når ein så i tillegg har eit trenar /støtteapparat/sponsorar og god klubbdrift med seg så er det berre opp til utøvarane å gjere den nødvendige jobben. Mange har lært av desse to og dei andre i idrettsmiljøet i GFIL. Det er slik vi greier å produsere toppresultat.   Fleire unge satsar mykje på friidretten i kjølevatnet av våre beste og er villege til å legge ned den treninga som krevst. Det er svært viktig å ha slike som Thomas og Evald som førebilete.

No reiser dei siste idrettsutøvarane av denne aldersruppa frå Sandane til utdanning andre stadar og vi her heime må fortsette arbeidet med å rekruttere nye til friidretten.  Her er både løparar/hopparar og kastarar som kan stå klare til å ta over.

Vi gratulerer EM fararane med super innsats og håpar de fortset i mange år med toppidrett. Nok ein gong ein ekstra gratulasjon til finalisten og 10 plassen.

NOR.